FAQ
© 2024 Staats- und Universitätsbibliothek
Hamburg, Carl von Ossietzky

Öffnungszeiten heute09.00 bis 24.00 Uhr alle Öffnungszeiten Leichte Sprache

Böker ut Hamborg höört in de Stabi

Wiel de Stabi de Landesbibliothek von Hamborg is, ward siet 1696 von all de Böker, de in Hamborg druckt worrn sünd, ümmer en Exemplar an de Stabi afgeben; in de letzten Jahrn gellt dat ok för Schallplatten, CDs un Kraam.

As Landesbibliothek von Hamborg oder ok hüüt as ‚Staatsbibliothek‘ – al von Beginn an worr allns, wat in de Stadt an Texten rutbröcht worrn is, sammelt. Siet 1696 geev dat erst en Verordnung, laterhen en Gesett, wona de Hamborger Verleggers un Druckers ümmer en Exemplar von de druckten Böker afgeben müssen – de Hochdüütschen seggt dar ‚Pflichtexemplar‘ to. Man in Juli 1943 is bi de Bombardierung von Hamborg in de Bibliothek de gröttste Deel von düsse Böker verbrennt - doch in vele Fällen kunn na den Krieg en Ersatz köfft warrn.

1988 worr de ole Regelung dörch dat „Gesetz über die Ablieferung von Pflichtexemplaren“ an de Tiet anpasst – darna müssen ok Schallplatten, CD’s, Kassetten un Kraam an de Stabi afgeben warrn. Siet den 8.9.2009 gifft dat denn noch en Novelle von dat Gesett, dat nu ok för ‚digitale Publikationen‘ gellen deit. Allns, wat von Amts wegen ünner de Lüüd geiht, t.B. von de Hamborger Börgerschop, von annere Behörden un sünst en öffentliche Institution, ward - egal ob de Text op Papier steiht oder elektronisch leesbar is – na en Verordnung ut dat Jahr 2008 hütigendaags sammelt.

Hamburger Bücher

De Bibliothek sorgt daför, dat jeedeen düsse Texten lesen kann – un dat ok op ümmer un ewig. Na dat Gesett mutt en ‚Pflichtexemplar‘ afgeben warrn, wenn de Exemplaren veelfach herstellt worden sünd un, üm se ünner de Lüüd to bringen; dat gellt för bestimmte Texten, Landkarten, Ortsplaans, Atlanten, Schallplatten, CD’s un Kraam; ok Biller, de mit en Text verbunnen sünd, de dat Ganze verklaren deit, höört darto. As ‚digitale Publikationen‘ süht dat Gesett all dat an, wat as Text, Bild oder Ton op en ‚Datenträger‘ oder in en Form, de een nich anfaten kann, in’t Internet stellt ward.

As ‚Pflichtexemplar‘ ward all schreben Texten sammelt, dar höört dat, wat öber en Verlag lopen deit, jüst so darto as dat, wat „griese Literatur“ nöömt ward un wat een nich öber den ‚normalen‘ Bookhannel köpen kann. Ünner annern höört darto:

  • wetenschoplich Literatur ut Verlagen, Hochscholen, Forschungsinstituten, Behörden, Museen, wetenschoplich Sellschopen oder von Lüüd, de ehr Book sölben rutbringen doot
  • allns von de Presse: Blööd, de dat däglich oder enmal de Week geben deit, Tietschriften för en bestimmte Profession un för allemann, Illustrierten, Programmtietschriften, Blööd öber Hamborg un ümto, Blööd, de bi’t Köpen un Verköpen ehrn Deenst doot, un Blööd, de speziell op een Stadtdeel utricht sünd
  • Roman‘ un Vertelln, Romanheften, Comics, Kinnerböker, Ratgebers, Reiseföhrers, Museumskatalogen, Landkarten und Stadtplaans
  • Publikationen von Hamborger Vereen‘, Verbänn‘, Parteien, Sellschopen, Weertschopsünnernehmen, Krinks un enkelte Lüüd
  • amtliche Publikationen